Job 33

Elihugo te Godigo bidi dabe dodolainu ebo kolesaga po wali

1 Tama Elihu agai po genina ma weyu, e tama wali.

“Megi da, Jop, megi da eno nage dali po waibao.
Tama eno homugo nago eno po dabe
waboba olo saganama odaluao.
2 Megi tama eno te po nagebolo pusaibao.
3 Tama eno te pusubo pogo nage
e tama megi ola mawaibao.
Ena Godigo gedude doloba pai bidi dao.
Tama eno homude yali po dolo naga pusubo dao.”

4 “God Tigidali Bomo Elalubo Bidigo Mobo Bidigo
ena nigai dao.
Tama agai mobo ena menama yaligo ena bidibao.
5 Polo begao, Jop, eno homugo nago ena dali pogo
hwįa homu ebao.
Tama nage usu ebaso da, teda nago eno po
wei ponagameo.
6 Te Godigo gedude da, dadi si te tiwai si naga dao.
Agai tǫ selama, ena nigai dao.
Deli tamago nage me nigai dao.
7 Tama tibaso, nago enade wi elamo.
Eno genuai sęgę nageba munama,
nage aiyaba elalugobeo,” wali.

8 “Tiali goli, eno nago po odali.
Nago po bomo elama, e tama wali,
9 nago dwai kolesaga me yai menio, po wali.
Tama tibaso, nage Godigo gedude meda meni yai bidiba.
Tama nago magi nai mede sę menio, po wali.
10 Tama nago e tama po wali, Godigo ena tonobo da,
aga boi bidi tonobo ąǫ elama, agai nage sęgę mani,
te dwai sę ebo bidi dabolo mabo yali gilama.
11 Agai nago sągą haligago gebelali tiwai yali, wali.
Tama nage menaba pabo si da,
teda agai nago sągą pasalu bugagia
osasa bilibo dao, wali.”

12 “Tiali goli, Jop, odao.
Nago te wali po da, dolo menio.
Tama megi da, eno nago po e tama ponaibao.
God da, polalubo mu dao.
Tama agai homu kolesaga dali,
bomo dali sigo da bidigo bomo dali,
homu kolesaga dali si edelai dao.
13 Magi baso nago Godibolo po hauwa weyu,
e tama wabo da, agai da bidi dabego
po wei ponobo meni, magi baso nago te po wabo dawe?
14 Tiali goli, God agai po dabolo
haniani sunumidu mabo dao.
Tiali goli, bidi dago agai po me sogo konebo menio,”
wali.

15 “Da hulide pibo sogo da,
Godigo haniani na dabe dabolo mabo dao,
16 tama te na dabede da, da ola mabo dao.
Tama da dwagi yai kolesaga menama,
tama dago bidi kolesaga dodolomainu ebo dao.
Tama agai te po dago homude dąų walumainu ebo dao.
17 Tama te kolesagago dago
dwai kolesaga yabo wi ilibo dao.
Tama agai dago tobolu gagea pabo aiyaba
tamunubo dao.
18 Magi baso meni.
Agai dago dwai kolesaga ebo wei meniama,
tama boi bidi dabego da ela munama,
tama da isibo bidi dabego buluba
pidali weyu, tama tibo dao,” wali.

19 “Tama me sogo Godigo bidi dodolobo
te tobage kolesagago tibo dao.
Godigo te bidi gasi ilama,
tama te bidi bede pila muyu, nomona selama,
dili dabe dene tigidali sogo ebo sę ilibo dao.
20 Tama aga nai tuabo hagela homu ebo dao.
Te bidi dabego dwagi yai mi dabe
sesebaso, me tagalobo dao.
Agai te tonobo da, te olo nai tonobo ąǫ ebo dao,
tama agai munu me tugobeo.
21 Agai tigi nomona selama,
tama dili pulu hą ebo dao.
Tama agai dili pulu hania ebo dao.
22 Pąde aga mu tama isabo ąǫ ebo dao,
tama bidi elama isilibo ensel bidigo aga
silagasabo dao.
Tama aga isai bidi dabego buluba tamadi paibao,” wali.

23 “Tiali goli, ma te Godigo ensel mobo bidi
hauwa mu
tomode deli digi aselama, te bidi tau sagasobaso
da,
teda agai dwagi yai kolesaga naga wali pomainu yaibao.
24 Tama ensel bidigo te bidi hobede ebaso,
tama Godibolo e tama hanalu waibao,
‘Nago te bidi hobede elama, tama te bidi isibo bidigo
buluba pomainu sula tagalamo,’ te po waibao.
‘Magi baso meni. Eno polo gegali,
te bidi ma usu ilabo sunumi elalubao,’
ensel bidigo te po Godibolo waibao.
25 Tama teda te bidigo tigi ma
usu elama, bomo ma yaibao.
Awe, te aga gesi bidide bidali tiwai tama ma yaibao.
26 Tama aga gedu haluasa po wabo si da,
teda Godigo agai gedu haluasa po wabo wei elama,
tama aga dwagi yai sę ilaibao.
Tama aga God pageba pelama,
dwagi yai homu mu yaibao.
Tama Godigo aga bidibo sogode aga nai dabe dolo
ma dodola mawaibao.
27 Tama te bidigo gasa we bidi dali pusuyu,
e tama waibao,
‘Eno dwai sę yai goli dao.
Eno dwagi yai kolesaga me yai menio.
Tama tibaso, Godigo eno tigide haniani sę mu igi dao.
Tiali goli, agai ena hobede elama, agai te sę ebeo.
Menio.
28 Agai ena ma dobola selama,
tama ena isibo bidigo buluba pabeo.
Ena me bidiyu yaide, bulu ula me subaso,
dwagi yai homu ebao,’ po wabo dao.
29 Si sela sogo Godigo te kolesaga
we bidi dabe dali ebo dao.
30 Magi baso meni. Agai augwali ma selama,
tama augwali me isigobeo.
Mu menio. Augwali bidiyu yaide,
Godigo we bidibolo mabo giliga ula subo dao,” wali.

31 “Megi da, Jop, nago odao.
Eno nage dali pusabo po meba elalubao.
Tama tibaso, pedauwali pania selama,
eno po waboba olo sagana munama, odao.
32 Tiali goli, ma nago po meba elalubaso da,
teda nago pusao. Eno odaibao. Magi baso meni.
Eno wei mu yali, te bidi dabego odama,
nago dwai sę dabe me ebeo homu emainao.
33 Tiali goli, nago po meni baso da,
teda pedauwali pania selama, eno po naga odao.
Tama eno nage ola menama,
tama nago dwagi yai homu kolesaga sagameo,”
Elihugo Jopbolo te po wali.